緬甸行 - 「浪漫」曼德勒

凌晨五點，火車到站，跟隨人群離開月台出站。三小時車程也未能睡好，迷糊地走出車站，例牌一個電單車司機上前，儘管我很不清醒但依然努力扮清醒地講出：「Can you help me find the hotel？Need 10000 1 night.」我好似有強調係要Hotel，而唔係問佢個人一晚一萬O唔OK。老江湖的電單車司機沒有面有難色聽懂，著我上車。

電單車帶我到某間酒店，迷糊問了前檯的老闆是否一房一萬一晚？係。我能否看一看？老闆很熱情著個Doorman拿著我的約十公斤背包上房，上至五樓時，我仍迷迷糊糊卻醒覺這老闆很識做生意，上咁高已經叫我騎虎難下了。

一萬元只有的是床位，下去，問老闆有沒單人房，有，萬二元。上去，收貨，下去，給錢，上去，失去意識倒臥在床。

一覺睡醒，走出露台一看，噢，咁樣樣。

曼德勒 (Mandalay) 市中心區真像個大棋盤，街道四四方方，這時拿起手機，聽起王菲的《棋子》，我還真像一只棋。

曼德勒的浪漫之名不知從何而來，或許先從平台望出去，周圍的房屋大多唔過六層。走出馬路，道路較為寬闊，過街難度比仰光高點，但車流看上唔似太高。相比仰光，曼德勒似顯得比較休閒，找間茶檔呆坐一天也是不錯的主意。可惜奶茶飲太多都會厭，雪糕鋪和果汁檔原都可以，只是我的腸胃一到這裡就叫我對這些不敢恭維。

先講較冷門的一個景點Chan Tharya Kyaung Taik，它是其中一座橫跨Thinga Yazer Channel的木橋，是背後City Park的麼天輪，像一條奔向夢幻樂園的通道。當你興致勃勃想自拍打卡時，岸邊一大堆垃圾，卻把你從夢中拉醒。

講開又講，緬甸街道係極難找到垃圾桶，人們都習慣亂拋垃圾，街道或許都有人定時掃下，但河岸顯然都係懶理。這個國家都係望上堂皇望下墜落。

曼德勒市內的主要景點都集中在曼德勒皇宮 (Nann Twin) 東北角，包括皇宮都要由東面十九街進入。

曼德勒皇宮其實係假古蹟，原本連同皇宮周邊的，都係雍笈牙王朝第十代君主敏東國王所營建，皇宮於二次大戰時被戰火燒毀，後來廣大的皇宮遺址被軍方用作軍營。一九八九年，軍政府或想到反正地大用唔哂可撈多兩個錢 (門票一萬元：包大曼德勒所有景點) ，於是就地重建了皇宮。故此皇宮內裡仍有大面積的禁區，門口有持大大支M16的軍人把守，或許國家已開放，聽聞窮凶極惡的緬甸軍人看上來神情輕鬆。但沒膽對住他們拍多張照，始終對自己人民開槍的都唔係好貨色。

皇宮的歷史，一入正門已睇哂，內裡其實幾空空如也，對唔使錢入去的當地人來講，就像一個大公園，一家就在敏東王雕像前野餐扮下王族。我這個付了錢的外國人，則當這裡像空置的度假村，或許找間沒多個人走過的宮殿，試試睡一下其木地板，還是算了，做唔慣這種事。

看厭了蒲甘的泥色或仰光的金色金塔，Kuthodaw Pagoda係讓你眼前一新：主塔仍是金色，但底座七百多白塔圍繞，好不壯觀。

鄰近的Shwenandaw Monastery分兩部分，一部是白色和金色的精緻融合，內裡因是敏東王接見賓客，故此內裡也是相當宏大。

另一部係比皇宮外貌更精緻的木製建築，看見精緻的雕刻，就覺得皇宮真係假到好撚求其。

曼德勒山係重頭戲，行慣山的，二百幾米山高你唔會當回事。只係不斷無止境的階梯，似又會令你措手不及。

能夠在日落時上到這裡，你都可以停步了。攻頂的話是聽聞要加錢的，還是打開你咖啡坐在一邊享受一下，何需一定要執著到頂樓去贏到這座山頭？

最後送的：中秋節時的月光，為這城補回名乎其實的浪漫。